Jakinak dira Koldo kasuko sumarioan diren bidegabekeriak, pandemia garaian musukoen salerosketan hasitakoak, eta gero gasolioaren salmentan eta bide lan publikoen esleipenetan borobilduak. Nafar jatorria du parte batean kasuak, bertakoak baitira Santos Cerdan eta Koldo García, hurrenez hurren, Milagros eta Huarten PSOEko zinegotziak izandakoak. Agintarien “haginkadak” daude oinarrian “Koldo Kasua” gisara ezagutzen den ustelkeria sarean. Susmopean dago Belateko tunelen bikoizketa egiteko bide-lana.
Besteak beste, auzipetuta daude, Jose Luis Abalos, PSOEko antolakuntza idazkaria eta Garraio ministro izandakoa, afera ezagutzearekin batera alderdiko kargua utzi behar izan zuena; Santos Cerdan nafarra, (kartzelan dago ekainaren 30etik…) haren ordezkoa PSOEko zuzendaritzan, Pedro Sanchez presidentearen ondoan; eta Koldo Garcia, Abalos Garraio ministroaren aholkularia.
Bien bitartean lanean jarraitzen du garraiolariak, garaiz erretiratzeko aukerarik gabe, eta horrelako bidegabekeriak bere izerdiarekin ordainduz. Enpresa handiek tarifak jaitsiko dituzte “zergarik gabeko” erregaiak merkatuko prezio normala baino merkeago eskuratzen badituzte; Bideko Aterpe kooperatiban baino merkeago.
Baztanen, bizilagunak eta garraiolariak kexu dira N121 errepidea bikoizteko bide lanaren ardura izan duen enpresaren gaitasun urriarengatik; izan ere, enpresa horrek ez zituen lanak azkartu, garraiolariek Belateko portu zaharretik bizia jokoan zuten bitartean. Hori guztia jasotzen da Garraiolariok aldizkariaren 135. zenbakian, beste gai batzuekin batera: hala nola Astigarragan beste aparkaleku “seguru” bat eraikitzeko proiektua; garraiolarien ekimenak garraioan erretiro aurreratuaren alde, eta beraz, prekarietatearen eta laneko ezbeharren aurka; garraioko gastu arrunten % 70eko deskontu fiskala; Hiru, Anet eta Tradisnak fiskalitatea hobetzeko eta kamioiei peajerik ez jartzeko Nafarroako Gobernuari egindako eskaera; beste informazio interesgarri batzuen artean. Era berean, ohiko atalak ditu, hala nola abokatuaren txokoa, 2025erako aseguruen prezioak edota denbora-pasak.
Aurreko zenbakiak
