UGT, CCOO, LAB, ESK, STEILAS, CGT eta Hiru sindikatuek prentsaurrekoan iragarri dituzte datorren asteazkenean, urriak 15ean, “borroka, mobilizazio eta batzar egunean” egingo diren manifestazioak, “Israel herri palestinarraren aurka egiten ari den genozidioa” salatzeko. ““Stop Genozidioa. Langileok Palestinarekin” lelopean, Nafarroan, beste lurralde batzuetan bezala, lanuzte eta mobilizazio orokor izaera hartu du egunak.
Urriaren 6an, astelehenean, eguerdian, prentsaurrean jakinarazi dituzte sindikatuek urriaren 15ean, goizez eta arratsaldez egingo diren mobilizazioak, batetik Gazako egoera salatzeko: ” mugimendu sindikala eta gehiengo sozial handi bat azken bi urteetan Gazako genozidioaren amaiera eta Palestinak Estatu askea izateko duen eskubidea eskatzen ari da”. Bestetik, Nafarroako zein Estatuko erakundeei eskatu diete, halaber, “genozidioarekin harreman oro eten dezatela, eta eskura dituzten tresna guztiekin presioa egin dezatela su-eten egoera bat lortzeko eta Palestinaren autodeterminazio eskubidea eta bere lurraldearen okupazioaren amaiera erdigunean jarriko duen ebazpen integral bat lortzeko. Era berean, Israelekin merkataritza-harremanak dituzten enpresei eta, oro har, patronalari eskatzen diegu gogoeta etikoa egin dezatela Palestinako genozidioarekin konplize diren eta nazioarteko legedia urratzen duten enpresa edo erakundeekin dituzten merkataritza-harremanei buruz “.
Hilaren 15ean, UGT, CCOO, LAB, ESK, STEILAS, CGT eta Hiru sindikatuak Iruñeko enpresa eta kaleetan mobilizatuko dira “langile klase osoak palestinar herriarekiko duen elkartasuna” adierazteko; “Israel herri palestinarraren aurka egiten ari den genozidioa eta gizateriaren aurkako krimenak, AEBko Gobernuaren babesarekin; Zisjordaniako lurralde palestinarraren etengabeko kolonizazioa eta horrek langile palestinarren lan eta bizi baldintzetan dituen ondorio larriak” salatzeko; eta “Gazako genozidioaren berehalako amaiera, Palestinaren okupazioa eta kolonizazioa amaituko duen eta herri palestinarrak askatasunean bizitzeko duen eskubidea bermatuko duen ebazpen integrala” eskatzeko; Sindikatuek eskatzen dute, era berean Israelekin Europar Batasunak duen Akordioa eta patronalak edota beste edozein erakundek, bertakoek zein nazioartekoek, dituzten merkataritza-harreman guztiak bertan behera uzteko.
“Langile-klase osoaren parte-hartze aktiboa bilatzen duen” borroka-egun horren esparruan, sindikatuek iragarri dute “elkarretaratzeak egingo direla lantokietan, ogitartekoaren orduan edo deitutako lanuzteen barruan lantoki bakoitzaren espezifikotasunera ondoen egokitzen den ordutegian (3: 00etatik 6: 00etara, 11:00etatik 14:00etara eta 17:00etatik 20:00etara)”, baita hainbat mobilizazio ere, egunean zehar. “Zehazki, 11:00etan kontzentrazioa egingo da Iruñeko Virgen del Camino Ospitalearen aurrean, eta handik martxa bat abiatuko da Golemetik barrena Antoniutti Parkeraino. Arratsaldean, 19:00etan, beste manifestazio bat egingo da, herritar guztiei irekia, Gazteluko plazatik hasita.
Sindikatuek 12:30ean Iruñean emandako prentsaurrekoan salatu dute “Israelek Palestinako Herriaren aurka egindako eraso bortitza: gaur ez du inork zalantzan jartzen genozidioa izan dela, Israelgo Estatua bera edo eusten dioten gobernuak eta interes ekonomikoak izan ezik. NBEko Batzorde Independentearen txostenak arrazoia eman die Amnistia Internazionala bezalako erakundeei: Israelek genozidioa egin du (eta egiten du) Gazako zerrendan dauden palestinarren aurka. Europa mailan, Europar Batasunak Israelekin duen merkataritza akordioa bertan behera utz dezan herritarren presioa fruituak ematen ari da. Hala ere, Europako Batzordea ematen ari den urratsa oso berandu dator, eta oso eskasa da. Horregatik, Europako Batzordeari eskatzen diogu onar dezala Israel genozidioa egiten ari dela Gazan, eta Europar Batasunaren eta Israelen arteko Elkartze Hitzarmena osorik hautsi dezala. Ez da zilegi harreman komertzialak izatea genozidioa egiten dutenekin, gerrako krimenak egiten dituztenekin eta nazioarteko legedia etengabe urratzen dutenekin “.
Halaber, sindikatuek gogorarazi dute Nazioarteko Justizia Gorteak (CIJ), Hegoafrika Israelen aurkako auzian, 2024ko urtarrilaren 26ko, martxoaren 28ko eta maiatzaren 24ko behin-behineko neurrien aginduetan, esan zuela kasu onargarri bat dagoela Israel genozidioa diren ekintzak egiten ari dela 1948ko Genozidioari buruzko Konbentzioaren arabera. Gorteak Israeli agindu zion ekintza genozidak eragozteko eta sarbide humanitarioa oztoporik gabe ahalbidetzeko. Zehaztapen juridiko horiek Estatuko eta Estatutik kanpoko eragile guztiak ohartarazten dituzte, enpresak barne, egintza horiek materialki erraztearen ondorio juridikoez. Erabilera bikoitzeko artikuluak azken erabiltzaile militarrei esportatzen jarraitzea, bereziki GNZk neurri lotesleak eman ondoren, gutxienez, legez kontrako azken erabilera posiblearen ezagutza eraikitzailea da, eta, beraz, erantzukizun osagarria nazioarteko zuzenbide penalaren arabera “.
