Gipuzkoako eta Nafarroako garraiolariek 10 urte baino gehiago daramatzate euren soldatak eta lan-baldintzak arautzen dituen hitzarmen kolektiborik gabe. Azkena 2008an sinatu zuten. Bizkaian eta Araban indarrean dute, baina baldintzapean. Bizkaikoa abenduan iraungitzen da, eta Arabakoa eraginkortasun mugatukoa da; UGTk bere kabuz sinatu zuen nahikoa ordezkaritza izan gabe. Beraz, enpresa handiek hainbat urtetan nahi dutena egiteko aukera izan dute, trabarik gabeko bide librea; bien bitartean, gidariek, eta bide batez euskal garraiolariek erosteko ahalmena nabarmen galdu dute. Espero dugu egoera hori zuzenduko dela datozen hilabeteetan sindikatuek Bizkaiko, Gipuzkoako eta Nafarroako patronalekin dituzten negoziazioetan. Sektoreko hitzarmen kolektiboen egoera jorratu dugu Garraiolariok aldizkariaren 129. zenbakian, beste albiste garrantzitsu batzuekin batera: kamioientzako bidesaria ezarri dela Bizkaiko beste hiru errepidetan, epaitegiek baliogabetutako arauen bidez Gipuzkoan 2018tik 2021era bidegabeki kobratutako bidesarien dirua itzultzeko erabakiak, 60 urterekin erretiroa eskatzeko mobilizazioak, ekainaren 3ko traktoradaren ondoren Biriatuko mugan sortutako kolapsoa, etab.
Gainera, Garraiolariok aldizkariaren 129. zenbakiak garraiolarien iritzia, abokatuaren txokoa, aseguruen prezioak, denbora-pasak eta ohiko beste atalak ere eskaintzen ditu.
Aurreko zenbakiak
